समृद्धी महामार्गावर अपघातांचे सत्र सुरूच असून सिन्नर शिवारात झालेल्या दोन अपघातात सहा जण जखमी झाले आहेत. यातील एका अपघातात कार 35 फूट उंचीवरून खाली पडली. सुदैवाने या घटनेत कोणतीही जीवितहानी झाली नाही. मात्र, समृद्धी महामार्गावर वारंवार अपघात होत असल्याने चिंता व्यक्त केली जात आहे.
शिर्डी ते भरवीर या समृद्धी महामार्गाच्या दुसऱ्या टप्प्याचे उद्घाटन झाल्यानंतर हा रस्ता वाहतुकीसाठी खुला करण्यात आला आहे. मात्र उद्घाटन झाल्यापासून अपघाताच्या घटना समोर येत आहेत. समृद्धी महामार्गावर काल चालकाचे नियंत्रण सुटले आणि कार 35 फूट उंच पुलावरून थेट अंडरपास रस्त्यावर पडली. ही घटना सिन्नर तालुक्यातील आगसखिंड शिवारात दुपारी दीडच्या सुमारास घडली. अपघातात कार सुमारे 35 फूट उंचीवरून पडून चक्काचूर झाली. या अपघातात घणसोली नवी मुंबई येथील तीन जण जखमी झाले असून त्यांच्यावर एसएमबीटी रुग्णालयात उपचार सुरू आहेत.
नवी मुंबईतील घणसोली येथील गोयल कुंटुबाचे तिघेजण स्विफ्ट कारमधून घोटीहून शिर्डीला जात होते. भरवीर येथील समृद्धी महामार्ग टोल प्लाझामध्ये प्रवेश केल्यानंतर ते समृद्धी महामार्गावरून शिर्डीकडे निघाले होते. आगसखिंड शिवारात कार आल्यानंतर चालकाचे कारवरील नियंत्रण सुटले. आगसखिंड शिवारातील अंडरपास पुलाजवळ दोन लेनमधील पुलाच्या रेलिंगला कार धडकली. यानंतर खाली जाणाऱ्या शिवार रस्त्यावर कारचा अपघात झाला. आगसखिंड येथील शिवरोड येथील कूपनलिका रोड परिसरात सुमारे 35 फूट उंचीवरून खाली पडल्याने कारचा अक्षरश: चक्काचूर झाला.
महामार्गावर काम करणाऱ्या काही लोकांनी हा अपघात पाहिला आणि त्यांनी तातडीने टोल बुथवर अपघाताची माहिती दिली. या अपघातात सनरिस गोयल, हेमिना गोयल आणि दिव्या गोयल यांचा मृत्यू झाला. नवी मुंबईतील घणसोली येथे तीन जण जखमी झाले आहेत. त्यांना रुग्णवाहिकेतून एसएमबीटी रुग्णालयात दाखल करण्यात आले. महामार्ग पोलिसांनी घटनास्थळ गाठून अपघाताची माहिती घेतली.
फुलेनगर शिवारात अपघात
समृद्धी महामार्गावर सिन्नर तालुक्यातील फुलेनगर माळवाडी शिवारात सकाळी दहाच्या सुमारास झालेल्या अपघातात तीन जण जखमी झाले. हायवे पोलीस स्टेशन सिन्नर हद्दीतील समृद्धी महामार्ग माळवाडी-फुले नगर शिवारात सिन्नरहून शिर्डीकडे जाणाऱ्या स्विफ्ट कारचा उजवा समोरचा टायर फुटल्याने गाडीवरील ताबा सुटला. संबंधित वाहन रस्त्याच्या कडेला असलेल्या गार्ड प्लेटला धडकले. या अपघातात चालक राशिद खान आणि अन्य दोन महिलांना किरकोळ दुखापत झाली आहे. मात्र, या अपघातात वाहनाचे मोठे नुकसान झाले आहे. अपघातग्रस्त वाहन वावी पोलीस ठाण्याच्या ताब्यात देण्यात आले असून वाहतूक पूर्ववत करण्यात आली आहे.