औरंगाबाद शहरातील गजबजलेल्या शहागंज भागातील कापड मार्केटला भीषण आग लागली. आगीच्या घटनेने परिसरात खळबळ उडाली असून अग्निशमन दलाच्या सात गाड्या घटनास्थळी दाखल झाल्या आहेत. पोलीसही घटनास्थळी पोहोचले असून अग्निशमन दलाच्या मदतीने आगीवर नियंत्रण मिळवण्याचे प्रयत्न सुरू आहेत.
याबाबत मिळालेल्या प्राथमिक माहितीनुसार, शहागंज परिसरात असलेल्या न्यू फॅशन होलसेल कापड दुकानाच्या तिसऱ्या मजल्यावरील गोदामाला दुपारच्या सुमारास आग लागली. आग लागल्याने परिसरात धुराचे प्रचंड लोट दिसून आले. औरंगाबाद महापालिकेच्या सात अग्निशमन गाड्या घटनास्थळी दाखल झाल्या आहेत. अग्निशमन दलाचे जवान आगीवर नियंत्रण मिळवण्याचे प्रयत्न करत आहेत. मात्र आग मोठ्या प्रमाणात पसरली असल्याने अग्निशमन दलाला अथक परिश्रम घ्यावे लागत आहेत. सुदैवाने कोणतीही जीवितहानी झाली नसली तरी आग आणखी भडकण्याची शक्यता आहे.
आगीच्या घटनेने परिसरात खळबळ
औरंगाबाद शहरातील गजबजलेल्या शहागंज परिसरात कपड्यांचा बाजार आहे. आजूबाजूला कापडाची मोठी घाऊक दुकाने आहेत. या ठिकाणी जिल्हाभरातून नागरिक खरेदीसाठी येतात. दरम्यान, आज दुपारी लागलेल्या आगीमुळे परिसरात एकच खळबळ उडाली आहे. आजूबाजूच्या दुकानदारांमध्ये भीतीचे वातावरण आहे. सध्या अग्निशमन दल आग विझवण्याचे प्रयत्न करत आहे.
