पुढच्या आठवड्यात फक्त दोन दिवस काम, या राज्यात राम मंदिराच्या उद्घाटनानिमित्त बँका राहणार बंद!

22 जानेवारीला यूपीमध्ये सार्वजनिक सुट्टी

अयोध्येतील राम मंदिर प्राणप्रतिष्ठा सोहळ्याच्या पार्श्वभूमीवर अनेक राज्यांनी २२ जानेवारीला सुट्टी जाहीर केली आहे. उत्तर प्रदेशातही २२ जानेवारीला सार्वजनिक सुट्टी म्हणजेच सरकारी सुट्टी जाहीर करण्यात आली आहे. यासंदर्भात शासनाकडून परिपत्रक जारी करण्यात आले आहे. दरम्यान, उत्तर प्रदेशमध्ये 22 जानेवारीला बँकांना सुटी असल्याचं वृत्त समोर येत आहे.

जर 22 जानेवारी म्हणजेच सोमवारी बँका बंद राहिल्या तर पुढील आठवड्यात उत्तर प्रदेशात फक्त दोन दिवस बँका सुरू राहणार आहेत. 21 जानेवारीला रविवार असल्याने देशभरातील बँका बंद राहणार आहेत. 22 जानेवारीला राम मंदिर उत्सवानिमित्त बँकेला सुट्टी असेल. त्यानंतर, मंगळवार, 23 जानेवारी आणि बुधवार, 24 जानेवारी रोजी बँकांमध्ये सामान्य कामकाज होईल.

सलग चार दिवस सुट्या

हजरत मोहम्मद अली यांच्या जयंतीनिमित्त गुरुवार, २५ जानेवारी रोजी बँकेला सुट्टी असेल. त्यानंतर दुसऱ्या दिवशी म्हणजे शुक्रवार, २६ जानेवारीला प्रजासत्ताक दिनानिमित्त बँका बंद राहतील. 27 जानेवारी हा महिन्याचा चौथा शनिवार आहे आणि त्यानंतर 28 जानेवारी रविवार आहे. असे पाहिले तर 25 जानेवारी ते 28 जानेवारी असे सलग चार दिवस बँका बंद राहणार आहेत. 21 जानेवारीपासून पुढील आठ दिवस बँका फक्त 2 दिवस सुरू राहतील आणि 6 दिवस सुट्या असतील.

सोशल मीडियावर परिपत्रक फिरत आहे

22 जानेवारीला बँक सुट्टीबाबत एक परिपत्रक सोशल मीडियावर शेअर केले जात आहे. परिपत्रकात असे म्हटले जात आहे की निगोशिएबल इन्स्ट्रुमेंट्स अॅक्ट 1881 अंतर्गत उत्तर प्रदेशमध्ये 22 जानेवारीला सर्व बँका बंद राहतील. याचा अर्थ सरकारी बँकांसोबतच खाजगी बँका देखील 22 जानेवारीला बंद राहतील.

अशा प्रकारे तुम्ही बँकिंगचे काम करू शकाल

बँकांना वारंवार सुट्ट्या आल्याने सर्वसामान्यांना बँकेच्या कामकाजात अडचणींचा सामना करावा लागू शकतो. अशा परिस्थितीत ज्यांना आर्थिक कामे करायची आहेत त्यांना ऑनलाइन सुविधांची मदत मिळणार आहे. या काळात लोक पैसे काढण्यासाठी एटीएम वापरू शकतात. पैसे ट्रान्सफर करण्यासाठी तुम्ही UPI, नेट बँकिंग किंवा मोबाईल बँकिंग वापरू शकता. बँकांच्या मोबाईल आणि इंटरनेट बँकिंग सेवा नेहमीप्रमाणे सुरू राहतील.