देशातील आघाडीची तांत्रिक संस्था आयआयटी हे विद्यार्थ्यांचे स्वप्न आहे. यामध्ये शिक्षण घेऊन आपले जीवन सुधारण्याचे लाखो विद्यार्थी स्वप्न पाहतात. आयआयटीमधून मोठ्या पॅकेजच्या नोकऱ्या मिळणे ही एक सामान्य गोष्ट झाली आहे. जागतिक मंदीमुळे यावर्षी आयटी क्षेत्रातील कंपन्या कमी भरती करत असल्याची बातमी अलीकडेच आली होती. परंतु, आयआयटी बॉम्बेने सर्व अपेक्षा धुडकावून लावल्या आहेत आणि यावर्षी विद्यार्थ्यांना जबरदस्त पॅकेज दिले आहे. आतापर्यंत मिळालेल्या माहितीनुसार, या प्रतिष्ठित संस्थेतील सुमारे 85 विद्यार्थ्यांना सुमारे 1 कोटी रुपयांच्या पॅकेजसह नोकऱ्या मिळाल्या आहेत आणि 63 जणांना परदेशी नोकऱ्या मिळाल्या आहेत.
1340 ऑफर्स देण्यात आल्या, 1,188 विद्यार्थ्यांना प्लेसमेंट मिळाले
माहितीनुसार, आयआयटी बॉम्बेच्या 63 विद्यार्थ्यांना परदेशी कंपन्यांनी नोकरीच्या ऑफर दिल्या आहेत, तर 85 विद्यार्थ्यांना कॅम्पस प्लेसमेंट दरम्यान आतापर्यंत 1 कोटी रुपयांहून अधिकच्या ऑफर मिळाल्या आहेत. 30 डिसेंबर 2023 पर्यंत कंपन्यांनी 1340 ऑफर दिल्या होत्या, ज्यांच्या मदतीने 1,188 विद्यार्थ्यांना प्लेसमेंट मिळाले आहे. या प्रतिष्ठित मुंबईस्थित IIT मध्ये Accenture, Cohesity, Airbus, Apple, Air India, Arthur D’little, Bajaj, Barclays, Da Vinci, DHL, Fullerton, Future First, Global Energy & Environ आणि Google सारख्या आघाडीच्या कंपन्या सहभागी झाल्या आहेत.
अभियांत्रिकी, आयटी आणि वित्त क्षेत्रात सर्वाधिक नोकऱ्या
आयआयटीकडून मिळालेल्या माहितीनुसार, आतापर्यंत अभियांत्रिकी आणि तंत्रज्ञान, आयटी आणि सॉफ्टवेअर, वित्त आणि बँकिंग, फिनटेक, मॅनेजमेंट कन्सल्टिंग, डेटा सायन्स आणि अॅनालिटिक्स, संशोधन आणि विकास आणि डिझाइन क्षेत्रात सर्वाधिक नोकऱ्या देण्यात आल्या आहेत. आयआयटी बॉम्बेने सांगितले की, जपान, तैवान, दक्षिण कोरिया, नेदरलँड, सिंगापूर आणि हाँगकाँगमधील कंपन्यांनी सर्वाधिक विदेशी नोकऱ्या दिल्या आहेत.
पहिल्या टप्प्यात सुमारे 388 देशी-विदेशी कंपन्यांनी सहभाग
2023-24 या वर्षासाठी प्लेसमेंट सत्राच्या पहिल्या टप्प्यात सुमारे 388 देशी आणि विदेशी कंपन्यांनी भाग घेतला. याशिवाय, सार्वजनिक क्षेत्रातील कंपन्या (पीएसयू) देखील प्लेसमेंट हंगामात उत्साहाने सहभागी झाल्या होत्या. या काळात कंपन्यांनी विद्यार्थ्यांशी आभासी आणि समोरासमोर बैठका घेतल्या.
